Правила святого поместного собора Гангрского (340)

1. Аще кто порицает брак, и женою верною и благочестивою, с мужем своим совокупляющеюся, гнушается, или порицает оную, яко не могущую внити в царствие: да будет под клятвою.

2. Аще кто, с благоговением и верою, ядущаго мясо (кроме крови, идоложертвеннаго и удавленины) осуждает, аки бы, по причине употребления онаго, не имеющаго упования: да будет под клятвою.

3. Аще кто учит раба, под предлогом благочестия, презирати господина, уклонятися от служения, и не с усердием и всякою честию служити господину своему: да будет под клятвою.

4. Аще кто о пресвитере, вступившем в брак, разсуждает, яко не достоин причащатися приношения, когда таковый совершил литургию: да будет под клятвою.

5. Аще кто учит невозбранно пренебрегати дом Божий, и бывающия в нем собрания: да будет под клятвою.

6. Аще кто кроме церкви особо собрания составляет, и, презирая церковь, церковная творить хощет, не имея с собою пресвитера по воле епископа: да будет под клятвою.

7. Аще кто церковныя плодоприношения приимати, или раздавати вне церкви хощет, без воли епископа, или того, кому поручено таковыя, и не по воле его творити хощет: да будет под клятвою.

8. Аще кто дает, или приемлет плодоприношения мимо епископа, или поставленнаго управляти благотворениями: и дающий, и приемлющий, да будет под клятвою.

9. Аще кто девствует, или воздерживается, удаляясь от брака, яко гнушающийся им, а не ради самыя доброты и святыни девства: да будет под клятвою.

10. Аще кто из девствующих ради Госоода, будет превозноситися над бракосочетавшимися: да будет под клятвою.

11. Аще кто презирает творящих вечери любви по вере, и созывающих братию в честь Господа, и не хощет имети общения в приглашениях, низким почитая творимое: да будет под клятвою.

12. Аще кто из мужей, ради мнимаго подвижничества, употребляет суровую верхнюю одежду, и, аки бы от сего получая праведность, осуждает тех, которые с благоговением носят шелковыя одеяния, и употребляют общую и обыкновением принятую одежду: да будет под клятвою.

13. Аще некая жена, ради мнимаго подвижничества, пременит одеяние, и, вместо обыкновенныя женския одежды, облечется в мужскую: да будет под клятвою.

14. Аще которая жена оставит мужа, и отыти восхощет, гнушаясь браком: да будет под клятвою.

15. Аще кто детей своих оставляет и не питает, и не приводит, по возможности, к подобающему благочестию, но, под предлогом отшельничества, нерадит о них: да будет под клятвою.

16. Аще некоторые дети, под предлогом благочестия, оставят своих родителей, наипаче верных, и не воздают подобающия чести родителям, да будут под клятвою. Впрочем правоверие да будет ими соблюдаемо предпочтительно.

17. Аще которая жена, ради мнимаго подвижничества, острижет власы, которыя дал ей Бог в напоминание подчиненности: таковая, яко нарушающая заповедь подчиненности, да будет под клятвою.

18. Аще кто, ради мнимаго подвижничества, постится в день воскресный: да будет под клятвою.

19. Аще кто из подвижников, без телесныя нужды, возносится и разрешает посты, преданные к общему соблюдению и хранимые церковью, пребывая притом в полном разуме: да будет под клятвою.

20. Аще кто, пришедши в надменное расположение, гнушаясь осуждает собрания в честь мучеников, и совершаемыя в оных служения и памяти их: да будет под клятвою.

21. Сия же пишем, поставляя преграды не тем, которые в церкви Божией, по писанию, подвижничествовати желают, но тем, которые подвижничество приемлют в повод гордости, возносятся над живущими просто, и вопреки писаниям и церковным правилам вводят новости. Таким образом мы и девство, со смирением соединенное, чтим, и воздержание, с честностию и благочестием соблюдаемое, приемлем, и смиренное отшельничество от мирских дел одобряем, и брачное честное сожительство почитаем, и богатства с правдою и благотворением не уничижаем; и простоту и малоценность одежд, употребляемых токмо ради попечения о теле неизысканнаго, похваляем; а изнеженнаго в мягкой одежде хождения отвращаемся. И домы Божии почитаем, и собрания бывающия в них, яко святые и полезныя приемлем, не заключая благочестия в домах, но почитая всякое место, созданное во имя Божие, и хождение в церковь Божию на пользу общую приемлем; и избыточествующия благотворения братий, по преданиям, посредством церкви нищим бывающия, ублажаем; и, да речем вкратце, желаем, да бывают в церкви вся принатая от Божественных Писаний и апостольских преданий.